Kico Fundashon Ultimo Deseo Aruba ta haci?
Un biaha mas un sonrisa riba cara di un ser keri, un biaha mas disfruta compania di familiar, amigo y otro personanan special, un biaha mas e sensacion di ta na cas, un biaha mas bishita playa, mira solo lanta, un biaha mas bay comunion di un nieto of carnaval. Djis algun ehempel. FUDA ta cumpli e ultimo deseonan di Arubianonan terminal cu ya no ta mobil mas y cu ta den e ultimo fase di nan bida. Tin biaha ta trata di deseonan hopi modesto, pero cu ta nifica hopi pa e hendenan aki y cu pa nan mobilidad limita ta fuera di nan alcance.
FUDA ta realisa e deseonan aki cu un ambulance, semper cu personal cu calificacion medico presente. Ta cumpli tur deseo sin costo; ta e fundacion ta carga e gastonan pa tur esnan envolvi cu e transporte den e ambulance. Banda di e persona den cuestion tin luga den ambulance pa 2 familiar/amigo y 2 boluntario di e fundacion (chauffeur y enfermero).
FUDA no ta regla solamente e transporte sino henter e pakete di deseo.
Deseo
Con e solicitud di e deseo ta funciona?
Pa nos por programa un deseo, nos mester haya un formulario yena cu e deseo. Asina cu e formulario drenta cerca nos, un di nos coordinadornan di deseo ta tuma contacto dentro di 24 ora y ta repasa e opcionnan pa programa e deseo. P’esey, como persona di contacto menciona bo number di telefon riba e formulario, pa nos por tuma contacto cu bo. Despues di entrega e deseo anos lo regla tur cos.
Gasto
Cumplimento di e deseo ta completamente gratis. Fundashon Ultimo Deseo Aruba ta carga tur gasto durante e dia di e deseo pa tur esnan cu ta compaña e persona den e ambulance. Esaki por encera entrada, reservacion etc. Esta no solamente e transporte.
Duracion
FUDA a drenta un convenio di cooperacion cu ImSan pa pone un ambulance cu chauffeur disponibel. Semper lo percura pa programa e deseonan den comun acuerdo.
Banda di esey tambe tin deseonan cu un fecha fiho (p.e. un casamento of algun festividad planea). Lo duna e informacion aki for di trempan na ImSan, pa eventualmente planea esaki.
Ademas, tin solicitud di emergencia cu no por pospone. E deseonan aki tambe lo wordo programa den bon consulta cu ImSan y nos lo considera si ta posibel pa cumpli cu e deseo riba e fecha solicita.
Pa ken por pidi un deseo?
Nos ta cumpli deseonan pa tur esnan cu ta depende di transportacion drumi den ambulance. Lamentablemente no ta posibel pa transporta rolstoel den ambulance.
Proposito di Fundashon Ultimo Deseo Aruba (FUDA)
-
FUDA ta cumpli e ultimo deseonan pa personanan inmobil y terminal na Aruba, sin importa nan historia social of cultural y/of nan status.
-
Cada ken por pidi un deseo; e persona mes, famia, amigo, personal di cuido of un colega, via e formulario di deseo aki.
-
FUDA ta cumpli e deseonan sin cobra gasto.
-
FUDA su mision ta pa duna cada persona terminal na cama e atencion cu e merece, pa preveni cu e persona fayece sin haci un ultimo deseo realidad. Door di experiencia e evento aki nos kier hisa e calidad di bida den e ultimo periodo ey, pa trece sikiera algun luz pa e persona mes y su hendenan den e ultimo dianan.
-
Ya cu ta un deseo so por ta e ultimo y pasobra nos kier ofrece esey na tur hende, nos por yuda cada persona un solo biaha!
-
E sitio di e deseonan ta varia. Nos ta mira kico ta posibel.
-
Via nos website y social media nos ta anuncia cua deseonan nos ta realisa.
-
Nos ta transparente riba e cantidad di deseo cu nos ta ehecuta y riba nos maneho financiero.
-
Nos semper ta habri pa colabora cu otro partidonan.
Formulario di deseo
Noticia
Aki nos ta publica e suceso reciente.
