Embahadornan - Grupo di Betico
Atualizado: 28 de out.
Cu mucho gusto nos kier introduci nos embahadornan nobo di FUDA:
Gos Oduber, Jouel Croes, Maikito Croes, Miguel Genser, Dennis Rasmijn, Rudney Lopez, Hemmy Croes, Michael Croes, Papa Maiky Croes, Dennis Oduber, Dino Luidens, Angelo Kock, Ofo Croes, Jaderick Croes, Jeremy Bonarriba, y Rendell Silva.
Hunto, e hombernan aki ta forma Grupo di Betico!
Grupo di Betico ta un grupo di musica folklorico Arubano cu a wordo funda no menos cu 57 aña pasa door di Betico Croes. E grupo a origina for di e bunita tradicion di fin di aña Arubano, esta di Dande.


Grupo di Betico ta toca y canta musica tradicional di Aruba, pero tambe ta skirbi y interpreta musica Arubano nobo, contemporaneo. Musica cu simplemente no ta laga bo sinta keto!
Tanto na Aruba como durante presentacionnan den exterior, Grupo di Betico sa di trece hende hunto y crea un fiesta grandi. Y nos ta increiblemente orguyoso y ta sinti asina honra di por anuncia awe cu FUDA a gana no solamente un embahador, pero henter un grupo di embahador pareu!
Di awor padilanti Grupo di Betico ta asocia cu Fundashon Ultimo Deseo Aruba (FUDA).
Nos ta sumamente agradecido pa e confiansa cu nan a deposita den FUDA y pa nan boluntad pa compromete como grupo pa conscientisa riba FUDA.
Pasobra hunto, nos por percura pa mas hende sa kico FUDA ta haci y cu nos por cumpli cu mas tanto ultimo deseo gratis posibel pa individuonan terminalmente malo y/of na cama cu ta depende di transporte di ambulance.
Bon Bini na FUDA, Grupo di Betico! Nos ta realmente ansioso pa logra cosnan maraviyoso hunto!
