Un Deseo Colorido: Bunita Mural pa Emmy Theysen na Savaneta

Nos team di Fundashon Ultimo Deseo Aruba (FUDA) ta asina contento cu diasabra 12 di

october 2024 nos por a cumpli e deseo di Emmy Theysen.

Inspira pa un potret di naturalesa di Michiel Oversteegen, Emmy Theysen a pinta un

cuadro di un Prikichi cu ta para riba e dadernan di un cadushi. Tabata su deseo pa traha un mural di su potret.

Mirando cu Emmy su condicion ya no tabata duna pa e mes traha e mural, nos a acerca Armando Goedgedrag, un colega artista Arubiano, pa haci esaki pa Emmy. El a bisa inmediatamente cu si.

Cada artista tin su propio manera di traha y su propio estilo. Esun di Armando ta hopi caracteristico, cu su wowo pa precision. Y cu su sentido di proporcion y bunita matiznan di colo, di cada mural e ta haci un fiesta pa wowo, tambe di e mural aki. Ta bon pa realisa cu Armando no a pinta e cuadro aki for di su mes man, pero cu tambe el a studia Emmy su cuadro hopi bon. Esaki kiermen cu Armando a interpreta cierto caracteristicanan di Emmy su cuadro den e mural aki. Armando a copia entre otro e mirada di e Prikichi cu no ta kita su bista for di bo, unda cu bo haya bo den e sala, pero tambe e frutanan cora di e dader, manera Emmy a pinta nan.

Armando a pinta e mural na Colegio Sagrado Curason, den e bario di Savaneta, caminda

Emmy Theysen a lanta. Unabes transporta eynan cu e ambulance di deseo di Faith & Hope, Emmy a duna algun pincelada como toke final, pa su man hunto cu esun di Armando lo keda warda den e mural aki. E ponemento di firma di ambos artista a desvela e mural bunita aki na un manera oficial.

Nos ta sumamente gradicido cu nos por a yuda realisa e deseo pa Emmy Theysen y nos ta yama danki na tur esnan cu a duna nan cooperacion.