FUDA a haya partner nobo pa asistencia di ambulance pa cumpli deseo na Aruba

Faith & Hope Medical Transport a indica cu nan trabounan regular y otro compromiso ta haci imposibel pa combina esey cu ofrece servicio di nan ambulancenan pa cumpli deseo. Pa tal motibo Faith & Hope a dicidi di termina e convenio di colaboracion cu FUDA.

Ultimamente FUDA a busca activamente un partner nobo y cu orguyo nos por anuncia cu ImSan ta dispuesto pa brinda nan sosten. ImSan a duna di conoce cu, contal cu tin suficiente personal disponibel y cu no tin calamidad na Aruba, nan lo pone un ambulance cu chauffeur disponibel pa cumpli (ultimo) deseonan pa persona terminal y/of na cama.

Banda di esey, FUDA tin e intencion pa introduci nos mes Ambulance di Deseo na Aruba. Mientrastanto FUDA ta conta cu e uzo di e servicionan di ImSan.

FUDA kier expresa su gradicimento na tur empleado di Faith & Hope pa nan esfuerso. Danki na nan contribucion boluntario nos por a realisa cuater deseo – un contribucion valioso y inolvidabel.

Na mesun momento FUDA ta yama ImSan cordialmente bonbini como partner den nos colaboracion y nos ta anticipa un colaboracion agradabel y significante.