Cooperacion entre Fundashon Ultimo Deseo Aruba cu Faith & Hope

Fundashon Ultimo Deseo Aruba (FUDA) ta un fundacion cu a wordo lanta pa cumpli e ultimo deseonan di personanan na Aruba cu ta terminal y na cama. Hoben, bieu, pober of rico, FUDA t’ey pa un y tur!

Den e ultimo fase aki hopi biaha e deseonan chikito tin un balor invaluable, pero pa motibo di e mobilidad limita nan ta dificil pa cumpli. FUDA ta haci e deseonan aki posibel!

Renate Raven, Presidente di Fundashon Ultimo Deseo Aruba, ta masha contento di anuncia cu el a drenta den un convenio di colaboracion cu Dayron de Cuba, Director di Faith & Hope Medical Transport, pa pone un ambulance cu chauffeur disponibel.

Durante e cumplimento di un deseo dos boluntario di e fundacion (chauffeur y enfermero) ta haci un trip cu e persona den cuestion. Hunto nan ta pasa un dia inolvidabel cu lo duna nan - no solamente e persona mes, sino tambe su sernan keri presente - recuerdonan bunita.

Con un peticion di deseo ta funciona?

Pa por programa un deseo tin mester di un formulario di deseo. Bo por haya esaki riba nos website. Asina cu e formulario drenta cerca nos, nos coordinador di deseo lo tuma contacto cu bo dentro di 24 ora, lo repasa e opcionnan cu bo y lo planea e deseo.

Abo conoce un hende cu nos por yuda cumpli cu nan ultimo deseo?

Yena e formulario di deseo riba nos website www.fuda-aruba.com

FUDA ta un organisacion di boluntario cu ta depende completamente di donacion pa cumpli deseo. Personanan priva, organisacionnan of empresanan por yuda cumpli soño! Por ehempel, organisa un caminata di sponsor na scol, pone un spaarpot den bo tienda, haci un recaudacion di fondo pret hunto cu bo coleganan etc.

Bo kier apoya FUDA door di haci donacion di un of mas deseo?

Haci bo donacion na:

Banco: CMB#65550908

Swift: CMBAAWAX

na nomber di Fundashon Ultimo Deseo Aruba (Semper pone den e descripcion: “Donacion na FUDA” pa e suma keda deducibel di bo impuesto riba ingreso).